Фото: Startup Stock Photos/Pixabay
Многумина од нас добар дел од своето време, професионално или приватно, го поминуваат седејќи пред компјутер, лаптоп, телевизор… без воопшто да внимаваат на правилната поставеност на телото, времето поминато седејќи, оддалеченоста од мониторот и ред други работи.
Според сите истражувања, сите тие навидум мали работи, се причина за големи последици на долги патеки. Седење повеќе од една декада, преку шест часа дневно ќе ви одземе седум квалитетни години живот, го зголемува ризикот од срцев удар (64%), можноста да заболите од рак на дојка или простата (30%) и да добиете дијабетес тип 2.
Токму поради овие причини кои никако не се за потценување, крајно време е малку повеќе да внимаваме на малите работи кои во текот на бурниот ден остануваат незабележани.
Во прилог се неколку совети кои ќе ви покажат како правилно треба да се седи, особено ако работата значи осум часа поминати пред монитор.
Столот на кој седите треба да биде така наместен за вашиот грб да не чувствува напнатост, а колената да бидат паралелни со колковите. Висината на столот треба да биде во таа висина да можете да ја користите тастатурта со зглобовите и подлактиците поставени во положба паралелна на подот.
Најдобра положба за вашите стапала е целосно на под. Доколку е потребно побарајте да ви се обезбеди подлога за нозете, која ќе ја приспособите на потребната висина. Нозете никогаш не треба да бидат скрстени!
Кога станува збор за очите, тие треба да бидат во права линија, а далечината колку што ви е испружена раката. Ниско или високо поставен монитор, може да предизвика нелагодност на вратот. Тастатурата треба да биде оддалечена од вас на растојание од 10 до 15 сантиметри, за да можете слободно да ги одмарате зглобовите додека пишувате. Внимавајте зглобот да ви биде исправен, а лактите странично до телото. Доколку користите глувче, истото да биде што поблиску до вас.
За дополнителна заштита на видот, мониторот не треба да има одблесок од сонце или светилка. Затоа многу е битно каде ќе биде наместен. Тука е и подесувањето на светлина на самиот екран која може да помогне во ситуацијата. Мобилниот телефон, хефталка, принтер, тефтери, пенкала и слично треба да се на дофат, за да се одбегне дополнително истегнување на рацете или телото.
Од големо значење е и изборот на столица на која седите додека работите. За оние што сакаат да испробаат нешто поразлично, можат да се обидат наместо на класични столици, да седат на топки.
“Активното седење е корисна алатка во борбата против деформитети на ‘рбетот. Со самото седење на столицата со топка се активираат абдоменалните и лумбалните мускули. Седењето на нестабилна површина ги зајакнува најнеактивните грбни и градни мускули кои се неопходни за правилна поддршка на ‘рбетот. Покрај тоа што столицата е корисна за ‘рбетот, активното седење е полезно и за намалување на телесната тежина. Со седење од неколку часа на ден се губат 350 калории. Самата столица содржи и мал водич со лесни вежби кои можат да се практикуваат секојдневно во канцеларија, училница или дома”, вели Радмила Ханџиска, маркетинг менаџер во Medicus help.
Од долго седење не се поштедени ниту најмалите, кои седењето во училишните клупи, дома го заменуваат со седење пред компјутер.
“Живеејќи во новата ера, во време на современи технологии, време на прекумерна употреба на компјутери и пасивни игри, слободно можеме да кажеме дека искривувањета на ‘рбетот се најчестите болести на денешните деца и воопшто цела популација. Најчести деформитети на ‘рбетот кои се јавуваат кај децата и кај возрасните се сколиозите и кифозите. Од одредени причини рбетот може да се искриви странично, на лево или на десно – сколиоза. Функционалните сколиози се едни од најчестите промени на ‘рбетниот столб кај децата, а се јавуваат како последица на долго лошо држење на телото. Кифозата пак претставува искривување на ‘рбетот кое што прилега на згрбавување. Кај децата во периодот на адолесценција, кога подвижноста на ‘рбетниот столб не е нарушена, кифозата може лесно да се корегира со вежби и правилно држење на телото”, советува Ханџиска.
