Купуваат електричен автомобил, добиваат субвенција, а потоа го препродаваат во странство

142

Како и во многу други земји, набавката на електрични автомобили во Германија е субвенционирана од државата. За ново електрично возило на клиентите им даваат до 9.000 евра.

Но, системот за субвенционирање очигледно е дизајниран како сито бидејќи протекува во сите правци. Како што пишува Spiegel, повикувајќи се на берлинскиот автомобилски истражувачки институт Шмит, одреден број германски купувачи на електрични автомобили прво ги користат субвенциите, а потоа ги продаваат своите автомобили во странство со профит.

„Губитник е германскиот даночен обврзник, кој на овој начин практично го субвенционира чистиот воздух во градовите надвор од Германија, а не во самата Германија“, вели во извештајот автомобилскиот аналитичар и основач на Институтот за истражување на автомобили Шмит, Матијас Шмит.

Шмит се потпира на податоците од Федералната управа за моторни возила – 890.000 електрични автомобили биле регистрирани во Германија помеѓу јануари 2012 и јули 2022 година – но податоците од 1 јули 2022 година покажуваат дека во Германија останале само 756.517 електрични возила.

Според Шмит, ова е доказ дека повеќе од 100.000 електрични автомобили го напуштиле германскиот пазар.

Од друга страна, според Федералната управа за моторни возила, сето тоа е само шпекулација. Разликата може да биде толку голема поради несреќи или отпис на возила.

За Шмит, тоа не е веројатно – на крајот на краиштата, повеќето електрични автомобили не се стари повеќе од десет години, а податоците за несреќи едноставно не ја поддржуваат идејата за толку многу електрични возила се исклучени од сообраќај.

Германските насоки за финансирање (субвенции) предвидуваат дека купувачот мора да го поседува електричниот автомобил најмалку шест месеци. После тоа, некои вешти трговци веднаш ги продаваат. Овие „легални“ трикови ги чинат германските даночни обврзници стотици милиони евра.

Сега се расправа за идејата дека електричните автомобили не треба да се продаваат во првата година од сопственоста. Така, загубата на вредноста би била поголема, а профитот на продаденото возило би бил низок, со што ќе се дестимулира овој вид препродажба на автомобили.