Германија, која се смета за најголема европска економија и една од најмоќните економии во светот, трпи зголемен притисок од последиците од последните две економски многу неизвесни и турбулентни години. Кризата сега е дотаму што, бидејќи функционерите веќе не се кријат, рецесија во следната година е практично неизбежна.
Германскиот министер за економија Роберт Хабек кон средината на минатиот месец изјави дека германската економија ќе заврши во рецесија во 2023 година, што според него е последица на економската војна на рускиот претседател Владимир Путин против Западот.
Хабек рече дека најголемата европска економија следната година ќе се намали за 0,4 отсто, наместо да порасне за 2,5 отсто како што се предвидуваше оваа пролет. Прогнозите за раст за 2022 година исто така се ревидирани надолу на 1,4 отсто, во споредба со претходната прогноза од 2,2 отсто.
„Бројките се лоши“, рече Хабек, иако истакна дека тие можеа да бидат многу полоши доколку владата одбраше да не дејствува. Тој тврди дека бројките докажуваат дека „чекорите што ги презедовме за заштита на економијата функционираа“.
„Во септември БДП беше само 0,6% позитивен“
Германското индустриско производство порасна во септември, но благо, покажаа официјалните податоци во понеделникот. Индустриското производство е зголемено за 0,6 отсто во однос на претходниот месец, објави Федералниот завод за статистика.
Наспроти ова, производството во енергетски интензивните индустриски гранки падна во септември за 0,9 отсто, објави канцеларијата.
Потрошувачките цени, усогласени во однос на другите земји од Европската унија, се зголемени за 11,6 отсто во октомври во однос на истиот период лани, објави Федералниот завод за статистика.
Зголемените трошоци за енергија и тесните грла во синџирот на снабдување придонесоа за раст од 26 отсто на стечајните постапки во Германија во август, соопшти економскиот институт IWH, додавајќи дека наесен се очекува нов бран на несолвентност.
Во истражувањето на германското индустриско здружение BDI, кое беше спроведено од средината на август до почетокот на септември, повеќе од една третина од 593 компании изјавија дека нивното постоење е загрозено од зголемувањето на цените на енергијата.
Дополнителен страв во јавноста предизвика изјавата на германскиот министер за економија Роберт Хабек, кој на прашањето на телевизијата АРД дали на германските компании им се заканува банкрот, одговори: „Не, но можам да замислам дека одредени индустрии едноставно престануваат да произведуваат одреден временски период“.
Речиси 10 отсто од средните индустриски претпријатија го запреа или го намалија производството, пренесува Handelsblatt, повикувајќи се на истражување на BDI. Истовремено, секоја петта од анкетираните компании размислува за делумно или целосно преместување на производството во странство.
Хемиска индустрија
Сегашната деловна ситуација во германската хемиска индустрија дополнително се влоши во октомври. Показателот кој ја следи активноста на секторот падна на минус 19,9 поени, наспроти минус 11,7 поени во септември, покажува истражувањето на економскиот институт Ifo.
