Европските берзански индекси денес се мешани, цените на нафтата и пченицата паднаа со истовремен пораст на цените на златото, додека инвеститорите се фокусирани на трговските тензии и податоците за стапката на невработеност во Соединетите Американски Држави, кои ќе бидат објавени во 14:30 часот.
Претседателите на Соединетите Американски Држави и Кина, Доналд Трамп и Си Џинпинг, одржаа телефонски разговор во кој двајцата лидери се согласија да продолжат со трговските преговори, но не беше постигнат конкретен напредок за смирување на пазарите.
Вчера, Европската централна банка ги намали каматните стапки за 25 базични поени и ги намали изгледите за инфлација во 2025 и 2026 година, но објави дека ќе продолжи да одржува претпазлив пристап во монетарната политика и да се потпира на тековните податоци при понатамошно одлучување за каматните стапки.
Денес во 9:30 часот, индексот DAX на Франкфуртската берза падна за 0,18 проценти на 24.276,92 поени, францускиот CAC 40 за 0,14 проценти на 7.779,44 поени, додека лондонскиот FTSE 100 порасна за 0,11 проценти на 8.820,79 поени, а московскиот MOEX за 0,44 проценти на 2.847,85 поени.
Вредноста на американскиот берзански индекс Dow Jones падна за 0,25 проценти на 42.319,74 поени, индексот S&P 500 за 0,53 проценти на 5.939,30 поени, а вредноста на индексот Nasdaq за 0,83 проценти на 19.298,45 поени.
Европските фјучерси за гас за јули беа продадени на отворањето на берзата TTF по цена од 36,395 евра за мегават-час.
Според моменталните податоци од берзата, цената на суровата нафта падна на 63.013 долари, а цената на нафтата од типот Брент на 65.032 долари.
Цената на златото се искачи на 3.357,05 долари за унца, а цената на пченицата падна на 5,4466 долари за бушел (еден бушел е еднаков на 27,216 кг).
Вредноста на еврото во однос на доларот на берзата Форекс е 1,14318, што е за 0,11 проценти повисока отколку на почетокот на тргувањето.