„Вака изгледа победата“, изјави Илон Маск на денот кога Доналд Трамп повторно положи заклетва. „Неверојатно сум возбуден за иднината… Една од најубавите американски вредности што ги сакам е оптимизмот.“
Денес, кога Трамп одбележува 100 дена од неговиот втор мандат, тој оптимизам речиси исчезна – американската берза го има најлошиот почеток на годината во последните 50 години. Индексите S&P 500 и Dow Jones паднаа за речиси 8% поради ескалацијата на царинската војна што ја иницираше Трамп, пишува Forbes.
Никој не почувствува поголем удар од Маск, кој сега е за 45 милијарди долари посиромашен отколку што беше на денот на втората инаугурација на Трамп. Маск отворено се судри со советникот на Трамп за царинска политика, Питер Наваро, на социјалните мрежи, се повлекува од Одделот за владина ефикасност на Трамп, принуден да се врати на фокусот на Тесла откако стравувањата од царини и неговото сè понепопуларно политичко ангажирање ги намалија акциите на Тесла за 33%.
Маск не е единствениот милијардер кој претрпе големи загуби во ерата на „Трамп 2.0“. Вкупно, американските милијардери (околу 800 од нив) изгубиле дури 300 милијарди долари од 20 јануари. Меѓу десетте најголеми губитници, заедно со Маск, се и технолошките гиганти: Џеф Безос од Амазон (-35 милијарди долари), Сергеј Брин од Алфабет (-26 милијарди долари) и Марк Цукерберг од Мета (-22 милијарди долари) – сите тие седеа веднаш зад семејството Трамп на инаугурацијата.
Загубите не им избегаа ниту на сојузниците на Трамп. Лари Елисон од „Оракл“, кој се сретна со Трамп веднаш по инаугурацијата како дел од иницијативата за инфраструктура за вештачка интелигенција вредна 500 милијарди долари, сега е посиромашен за 28 милијарди долари – трет најголем губитник. Стивен Шварцман од Блекстоун, кој прво одби да го поддржи Трамп, а потоа се предомисли, изгуби 11 милијарди долари.
Кои се победниците?
Сепак, некои милијардери успеаја да го зголемат своето богатство и покрај турбулентните пазари. Ворен Бафет, кој ги нарече тарифите „чин на војна“, ја одржа стабилноста на „Беркшир Хатавеј“, канализирајќи дури 334 милијарди долари во готовина и парични еквиваленти. Тоа придонесе за пораст на акциите од 13% и додаде речиси 20 милијарди долари на неговото богатство. Други добитници се Питер Тиел (+4,9 милијарди долари) и Александар Карп (+3,6 милијарди долари), благодарение на зголемувањето на вредноста на Палантир, кој има договори со американската влада.
Наследниците на основачот на „Волмарт“, Сем Волтон, се исто така меѓу победниците – секој од нив е побогат за најмалку 3 милијарди долари, бидејќи потрошувачите се свртуваат кон „Волмарт“ поради инфлацијата. Извршниот директор на „Волмарт“, Даг Мекмилон, се сретна со Трамп минатата недела за да лобира против царините.
Додека поранешниот извршен директор на „Мајкрософт“, Стив Балмер, изгуби 8 милијарди долари поради изложеност на технолошки акции, основачот Бил Гејтс профитираше благодарение на диверзифицираното портфолио и инвестициите во фирми како „Репаблик Сервисиз“, чии акции пораснаа за 15%.
Интересно е што и Трамп лично не се снајде добро – неговото богатство се намали за 1,5 милијарди долари. Акциите на неговата компанија „Трамп Медиа енд Технолоџи Груп“, сопственик на мрежата „Трут Сошнал“, паднаа за 35%, четири пати повеќе од просечниот пад на пазарот. Сепак, Трамп внимателно го следи богатството на своите пријатели: на 9 април, тој се пофали во Овалната соба дека Чарлс Шваб заработил 2,5 милијарди долари тој ден, а Роџер Пенск 900 милиони долари. Сепак, Шваб е побогат само за 375 милиони долари денес отколку на денот кога Џо Бајден ја напушти функцијата, додека Пенск изгуби 1,1 милијарда долари.
Најголемите губитници (100 дена од вториот мандат на Трамп):
Илон Маск (Тесла, СпејсИкс): – 45,3 милијарди долари
Џеф Безос (Амазон): – 34,8 милијарди долари
Лари Елисон (Оракл): – 28,2 милијарди долари
Лари Пејџ (Гугл): – 27,4 милијарди долари
Сергеј Брин (Гугл): – 25,6 милијарди долари
Џенсен Хуанг (Нвидиа): -24,9 милијарди долари
Марк Закерберг (Фејсбук): – 21,5 милијарди долари
Мајкл Дел (Дел): – 16,8 милијарди долари
Стивен Шварцман (Блекстоун): – 10,9 милијарди долари
Стив Балмер (Мајкрософт): – 8,4 милијарди долари
Најголеми победници:
Ворен Бафет (Беркшир Хатавеј): +19,8 милијарди долари
Питер Тил (Палантир): +4,9 милијарди долари
Бред Џејкобс (логистика): +4 милијарди долари
Лин Бин (паметни телефони): +3,7 милијарди долари
Александар Карп (Палантир): +3,6 милијарди долари
Роб Волтон (Волмарт): +3,1 милијарди долари
Џим Волтон (Волмарт): +3,1 милијарди долари
Алис Волтон (Волмарт): +3 милијарди долари
Роберт Дуган (аптека): +2,9 милијарди долари
Бил Гејтс (Микрософт): +2,5 милијарди долари
