Жителите на 27-те земји-членки на Европската унија оствариле 879 милиони туристички патувања со најмалку едно ноќевање во 2021 година. Ова е за петтина повеќе отколку во 2020 година, кога имало 713 милиони патувања, покажуваат најновите податоци на Канцеларијата за статистика на ЕУ (Евростат). Овие бројки сè уште се под нивото пред пандемијата на корона вирусот, бидејќи во 2019 година беа забележани 1,1 милијарда туристички патувања.
Жителите на три земји направија повеќе од половина од сите туристички патувања во ЕУ минатата година: Франција (200 милиони патувања), Германија (178 милиони) и Шпанија (131 милиони).
Кризата со корона доведе до промена кон домашниот туризам. Во 2020 и 2021 година, жителите на ЕУ оствариле туристички патувања во рамките на нивната земја на живеење во околу 85 отсто од случаите, во споредба со 73 отсто од домашните патувања во 2019 година.
Патувањето во другите земји на ЕУ сочинуваше 12 отсто од сите туристички движења минатата година (во споредба со 11 отсто во 2020 година и 20 отсто во 2019 година). Од друга страна, бројот на патувања до дестинации надвор од ЕУ бил само три отсто, исто како и во 2020 година, додека во 2019 година учеството изнесувало осум отсто.
Во однос на ноќевањата, домашните патувања се во просек пократки од меѓународните патувања. Сепак, учеството на домашниот туризам во вкупниот број ноќевања во 2021 година изнесува 73 отсто.
Минатата година деловните патувања сочинуваа осум проценти од сите пријавени патувања, во споредба со девет проценти во 2020 година и 11 проценти во 2019 година.
Бројот на патувања за лични цели се опорави во 2021 година и се врати на 80 проценти од нивоата пред пандемијата (811 милиони во споредба со една милијарда во 2019 година). Сепак, бројот на службени патувања порасна многу помалку и достигна само 55 проценти од бројките пред пандемијата (68,4 милиони во споредба со 125 милиони), што укажува на значителна промена кон далечински или хибриден бизнис.
