Вешти хакерски групи со поддршка на непријателски земји сè повеќе напаѓаат европски јавни институции со цел сајбер шпионажа, објави Европската агенција за сајбер безбедност ENISA.
Јавните институции се најчести цели на напади и сочинуваат 38 проценти од анализираните инциденти, според годишниот извештај објавен од таа агенција.
Самата Европска Унија (ЕУ) е редовна цел на напади. Освен обидите за сајбер шпионажа, дел од активноста се сведува на обиди за збунување на јавноста со дезинформации.
Извештајот го опфаќа периодот од 1 јули 2024 година до 30 јуни оваа година.
Неколку европски земји минатиот август објавија дека биле цел на хакерска шпионска кампања за која се верува дека потекнува од Министерството за државна безбедност на Кина.
Во мај оваа година, Холандија ѝ припиша слична кампања на Русија, а Чешка ја обвини Кина за сајбер напад врз Министерството за надворешни работи со кој се доби пристап до илјадници класифицирани е-пораки.
Според ENISA, најголемата закана се нападите со уцена, кои влегуваат во информацискиот систем и го блокираат, а потоа бараат пари за повторно да се овозможи пристап до блокираниот систем.
Најчестата форма на напад беше оневозможување на нормалното работење на серверот со негово преплавување со голема количина на податоци од Интернет.
Сè поголем број хакерски групи ги реплицираат меѓусебните тактики на напад, особено кога целта е да се скрие од каде доаѓаат нападите.
Една од позначајните закани е онаа за синџирите на снабдување поради меѓусебната поврзаност на системите, што може силно да ги влоши последиците од сајбер напад.
Патниците на аеродромите во Брисел, Берлин и Лондон неодамна беа одложени поради сајбер напад врз компанијата за пријавување и качување „Колинс Аероспејс“.
„Секој мора да преземе одговорност. Секоја компанија може да ги почувствува последиците од напад врз некого. Ние сме толку зависни од информатичката технологија. Не е убаво да се слушне, но е вистина“, изјави за „Политико“ главниот оперативен директор на ENISA, Ханс де Врис.
PwC спроведе анкета за довербата во дигиталното опкружување, според која експертите за сајбер безбедност и бизнис лидерите сметаат дека вештачката интелигенција е клучна во планирањето на нивниот буџет за сајбер безбедност.
„Според анкетата, во која беа анкетирани 3.887 главни оперативни директори и главни технолошки директори од 72 земји и територии, само околу половина од лидерите за безбедност и операции веруваат дека нивната организација е многу способна да се брани од сајбер напади. Покрај тоа, само 6 проценти од испитаниците веруваат дека нивните системи се многу ефикасни во сите области опфатени со анкетата, и покрај брзиот развој на нови технологии како што се вештачката интелигенција и квантното пресметување кои го менуваат пејзажот на сајбер ризиците. Помалку од половина од организациите веруваат дека се многу способни да решат клучни области како што се слаба автентикација и контрола на пристап (55 проценти), ранливи поврзани уреди и производи (48 проценти), застарени системи (45 проценти) и ранливости во синџирот на снабдување (43 проценти), кои се исто така, според резултатите од истражувањето, најслабите точки“, објави PwC.
Во согласност со трендот од минатата година, речиси осум од десет организации (78 проценти) наведуваат дека нивниот буџет за сајбер безбедност ќе се зголеми во 2026 година, што дополнително потврдува колку е важно зајакнувањето на сајбер капацитетите во контекст на сè посложени ризици.