Европа се соочува со зголемен ризик од рецесија поради растот на цените на нафтата и гасот поради загриженоста дека Русија би можела целосно да го прекине снабдувањето, велат економистите од јапонската банка Номура.
Европската економија ќе биде под влијание на различни фактори, вклучувајќи го и падот на побарувачката во САД, нивниот најголем извозен пазар, додека последица од континуираната руска интервенција во Украина е зголемувањето на цените на храната и енергијата, според јапонската инвестициска банка Номура.
Номура наведува дека очекува европската економија да почне да се намалува во текот на втората половина од тековната година и дека рецесијата ќе продолжи до летото 2023 година, со вкупен пад на БДП од 1,7 отсто, пишува Гардијан.
Цените на енергијата веќе пораснаа во втората половина на минатата година, кога водечките економии ги укинаа блокадите поради пандемијата на коронавирус, но руската инвазија на Украина донесе дополнителни тешкотии, бидејќи ЕУ, САД и Велика Британија се обидоа да ја изолираат Русија економски. Сепак, Европа сè уште многу се потпира на Русија за снабдување со енергија.
Европа се бори со „условите кои се многу глобални по природа (зголемување на цените на енергијата, инфлација, зголемени геополитички ризици и несигурност) кои нè наведуваат да веруваме дека европските економии ќе ја доживеат истата судбина како и САД, рецесија“, според Номура. Инфлацијата во еврозоната во јуни достигна годишна стапка од 8,6 отсто, што е највисока од постоењето на заедничката валута.
Најголемата европска економија, Германија, е особено ранлива поради руската контрола врз гасоводот Северен тек 1. Беше најавено дека гасоводот ќе биде затворен во период од 10 дена, почнувајќи од 11 јули поради планираните поправки, но германскиот министер за економија Роберт Хабек изрази сомневање дека гасоводот ќе остане затворен по поправките, што може да предизвика недостиг на гас.
