Во Србија, почнувајќи од денес, платите во образованието и здравството ќе бидат повисоки за пет проценти, а минималната плата ќе се зголеми од претходните 457 на 500 евра, или за 9,4 проценти.
Со ова вонредно зголемување, платата на вработените во образованието со седми степен, односно наставниците во основните и средните училишта, ќе биде повисока од 106.000 динари (околу 904 евра).
Просечната плата на медицинска сестра сега ќе биде повеќе од 90.000 динари, (767 евра), а основната плата на лекар специјалист без додатоци ќе надмине 170.000 динари (1450 евра).
Од почетокот на годината, платите во образованието се зголемија за 11 проценти, а првото вонредно зголемување од пет проценти оваа година беше на 1 март.
Редовно зголемување на платите во образованието се очекува и од 1 јануари 2026 година.
Министерот за финансии Синиша Мали претходно изјави дека со претходните две и со ова зголемување од 1 октомври, платите на вработените во образованието се кумулативно повисоки за 22,4 проценти само оваа година, што, како што нагласи, е значително зголемување на платите во образованието ако се земе предвид дека просечната инфлација оваа година е некаде околу четири проценти.
Минималната плата од 1 јануари годинава е повисока за 13,7 проценти, а освен ова октомвриско вонредно зголемување од 9,4 проценти, со синдикатите и работодавачите е договорено редовно зголемување на минималната плата од почетокот на следната година за 10,1 процент, односно на 551 евро.
