Американскиот милијардер и сопственик на компанијата „Амазон“ Џеф Безос и неговата свршеница Лорен Санчез ја променија локацијата на свадбата и решија да се венчаат во помалку прометниот дел од Венеција во сабота, по масовните протести против одржувањето на настанот во центарот на градот.
Проблемите пред самата свадба на Џеф Безос и Лорен Санчез покажаа дека дури и милијардерите не се имуни на јавното незадоволство. Двојката беше принудена да ја промени локацијата на својата свадба во Венеција откако локалното население бурно реагираше на планираната церемонија во самиот центар на градот.
Имено, приемот беше планиран во палатата Мисерикордија, од 14 век, а по протестот, каде што некои учесници се заканија дека ќе „пуштат крокодили“ во венецијанските канали, Безос и Санчез ја променија локацијата. Наместо тоа, двојката ќе се венча во палатата Арсенале, на каналот Галеаче, на источниот дел од островот, објави Скај 24.
Тие престојуваат во истиот луксузен седумзвезден хотел во Аман каде што престојуваа Џорџ Клуни и Амал Аламудин за време на нивната свадба во Венеција во 2014 година, открија извори за Анса.
Големи јахти и приватни авиони почнаа да пристигнуваат во Венеција во вторник за големата свадбена прослава, која ќе трае од четврток до сабота. Јахтата долга 60 метри во сопственост на филантропот Бил Милер, како и јахтата Киснет долга 122 метри во сопственост на милијардерот Шахид Кан, беа меѓу првите што се закотвија во Венеција, каде што протестите неодамна се засилија поради „преземањето“ на главните објекти на градот од страна на Безос, објавува Анса.
Поради високото ниво на безбедност и строгата доверливост што ја придружува најелегантната свадба во годината, службениците на аеродромот Марко Поло не сакаа да го откријат идентитетот на патниците од бројните приватни авиони што веќе пристигнаа, пишува RT Balkan.
Од протест до поддршка
Неодамна, протестите на младите луѓе кои се против влијанието на богатите и претворањето на Венеција во сцена за гламурозни настани одекнаа во Венеција. Сепак, мислењата се поделени – некои веруваат дека протестот против свадбата е сепак прекумерен и несоодветен. А градоначалникот на Венеција излезе во одбрана на двојката, изразувајќи жалење за протестот и надеж дека нема да ги одврати од свадбата, со порака дека не размислуваат сите како демонстрантите.