Поглед од 200.000 евра:Шпанска компанија за вселенски туризам планира да испрати туристи до работ на вселената

33

Шпанската компанија за вселенски туризам HALO space, со седиште во Мадрид, планира да испрати туристи до работ на вселената.

Имено, компанијата дизајнираше капсула која ќе се закачи за балон, а првиот тест лет го закажа за декември, пренесува Yahoo news.

Билетот за ова уникатно патување ќе се движи од 100.000 до 200.000 евра, а во капсулата можат да се сместат осум патници и еден пилот.

Целата соба е во прозорци, обезбедувајќи прекрасна глетка за сите кои ќе се одлучат да направат ваков вид на патување.

Вториот пробен лет е планиран за крајот на првиот квартал од следната година.

Првите комерцијални летови, во траење од шест часа, се очекува да започнат во 2025 година, а компанијата планира да оперира на четири континенти, со вкупно 400 комерцијални патувања со 3.000 патници годишно од 2029 година.

Извршниот директор и основач на HALO Space, Карлос Мира, рече дека „нивниот приоритет од првиот ден е оперативната и техничката извонредност“.

– Во изминатите 12 месеци работевме со најдобрите и најискусните компании во светот на воздухопловната индустрија за да ја искористиме постоечката, докажана и безбедна технологија. „Нашиот тим е многу задоволен од она што е постигнато во првата година, но ние сме уште повозбудени за тоа каде одиме – да однесеме илјадници патници до работ на вселената во искуство што ќе го промени животот до 25 милји (40 километри) над Земјата“, рече Мира.

Швајцарска инвестициска банка процени дека комерцијалните вселенски летови имаат потенцијал да станат бизнис од 3 милијарди долари (околу 2,9 милијарди евра) во следната деценија.