Предупредување од првата банка на Европа: Ќе биде тешко за државите, но и за домаќинствата

144

Европската централна банка (ЕЦБ) денеска предупреди на зголемените ризици за финансиската стабилност на сите, од банките до владите и домаќинствата, бидејќи економските изгледи се затемнуваат додека официјалните лица се борат со рекордните стапки на инфлација.

Притисоците по трошоците за живот ја намалуваат способноста на луѓето да ги сервисираат долговите, а влошената перспектива за економскиот раст во Европа ги загрозува корпоративните профити, објави денеска ЕЦБ во својот извештај за финансиската стабилност, пишува Блумберг.

Документот укажува на потенцијалните ризици за јавните финансии бидејќи владите преземаат повеќе долгови за да го ублажат влијанието на енергетската криза и предупредува на натамошен надолен притисок врз цените на акциите.

Исто така, се додава дека цените на недвижностите би можеле да достигнат врв по повеќегодишен пораст.

„Граѓаните и компаниите веќе ги чувствуваат ефектите од зголемената инфлација и забавувањето на економската активност. Нашата проценка е дека ризиците за финансиската стабилност се зголемени, додека техничката рецесија во еврозоната станува се поверојатна“, изјави потпретседателот на ЕЦБ, Луис де Гуиндос.

Комбинацијата од зголемените цени и намаленото производство предизвикано од руската војна во Украина претставува предизвик за креаторите на политиката, како и за инвеститорите. ЕЦБ го започна најагресивниот циклус на зголемување на стапките во својата историја за да спречи инфлацијата да се вкорени, и покрај претстојниот економски пад во еврозоната.

Централната банка на 19-члениот валутен блок ќе продолжи да ги зголемува каматните стапки и да го намалува портфолиото на обврзници од 5,0 трилиони евра (5,2 трилиони долари) на нејзиниот биланс.

Ризичните средства остануваат „нестабилни поради неизвесниот пат на инфлација, монетарната политика и економскиот развој“, забележа ЕЦБ, додавајќи дека вредноста на некои акции, вклучително и во САД, „сè уште изгледа растегната со оглед на фундаментите“ – дури и по големите корекции.

„Многу е тешко да се постигне финансиска стабилност без стабилност на цените“, изјави Де Гуиндос за новинарите во Франкфурт, според њујоршката агенција.