Приоритет е македонските компании да растат, стоиме целосно на услуга на бизнисот, вели Мицкоски

Главен приоритет и примарен интерес е македонските компании да растат, потенцира премиерот Христијан Мицкоски на средба со претставниците на Стопанската комора на Северо- Западна Македонија.

“Зашто е тоа интерес- затоа што колку тие побрзо ќе растат, колку по робусно ќе растат толку повеќе приходи ќе имаат во самиот буџет, а колку повеќе приходи ќе имаат толку повеќе инвестиции ќе има во образованието, во здравството ќе има повисоки плати, повисоки пензии, во земјоделието, во културата, во спортот, во инфраструктурата итн“, рече Мицкоски.

– Како влада се насочивме жестоко да работиме заедно со македонската економија, со компаниите и да ги помагаме тие побргу да растат. И во таа насока денеска разговаравме за оној заем кој што веќе го земавме, од половина милијарда евра односно заем за кој што имаме согласност заедно со унгарската влада, којшто сега треба да биде официјално и потпишан, потоа преку закон да биде и ефектуиран во рамките на парламентот и како сето тоа ќе  функционира за поддршка на економијата; условите се тие 3,25 % фиксна каматна стапка, 15 години, 3 години грејс период 12 години рок на отплата. Тоа што државата го зема, тоа го дава на стопанството.

Сега ќе видиме во следна фаза ќе отвориме разговори со комерцијалните банки да видиме дали како опција тамо ќе се пласира или ќе се пласира на друг начин но важно е дека не сакаме да биде оптеретен овој кредит со дополнителни услови бидејќи цениме дека е поволен, на пазарот е можеби со два пати поповолни услови од она што може да се обезбеди од комерцијалните банки и цениме дека на овој начин можеме да го помогнеме стопанството.

Од страна на комората на Северо-Западна Македонија, беше  исто така потенциран фактот околу минималната плата се зборуваше и за земјоделието, ценам дека беше исклучително плодна дискусијата“, рече Мицкоски.