Русија го истражува „Нетфликс“ поради „геј пропаганда“

9

Русија ќе го испита „Нетфликс“ за стриминг содржина што содржи таканаречена „геј пропаганда“, за која се вели дека е неозначена правилно, објави деловниот весник „Ведомости“.

Сето ова следи откако јавниот комесар за заштита на семејството, Олга Баранец го обвини американскиот онлајн видео сервис „Нетфликс“ дека го прекршил рускиот закон за „геј пропаганда“. Таа се пожалила во МВР дека „Нетфликс“ го прекршил законот од 2013 година, кој забранува ширење „пропаганда за нетрадиционални сексуални односи“ меѓу Русите помлади од 18 години кога емитуваат ЛГБТ серии со ознака 16+.

Сегашните закони во Русија дозволуваат „девијантни“ содржини, со исклучок на педофилија, да се емитуваат како „18+“.

„Шарената колекција на филмови и ТВ серии на „Нетфликс“ е за животите на хомосексуалците, лезбејките, бисексуалците и трансродовите луѓе“, изјави Баранец за „Ведомости“.

Органите на редот обично поднесуваат прекршочни пријави против прекршителите на контроверзниот руски закон за забрана на „геј пропаганда“ против малолетници, потсетуваат медиумите.

Претходно во ноември, судот во Москва го казни рускиот музички видео-канал „Муз-ТВ“ со милион рубљи (14.000 долари) затоа што во шоуто беа прикажани ѕвезди кои го менуваат полот и, како што велат гледачите, изгледало како „истополова свадба“.

Иако активистите за човекови права и западните земји го критикуваа законот за „геј пропаганда“ од 2013 година, социјално конзервативната база на поддршка на претседателот Владимир Путин во голема мера го поддржа, а анкетите покажуваат вкоренети анти-ЛГБТ ставови кај Русите.

Дефиницијата на бракот како заедница меѓу маж и жена сега е содржана и во Уставот на Русија по гласањето за уставните амандмани од 2020 година.

Претходно овој месец, Ведомости објави дека руските интернет провајдери размислуваат за сеопфатни забрани за „перверзни“ телевизиски емисии и филмови на стриминг платформите.

Предложените правила ќе влијаат на онлајн стримингот за прв пат и може да доведат до тоа руските интернет провајдери да блокираат филмови како „50 нијанси сиво“.