Централната банка на Аргентина ја зголеми основната каматна стапка за шест процентни поени на 97 отсто во понеделникот, 15 мај, во обид да се бори против зголемената инфлација која достигна највисоко ниво во последните 30 години.
Централните банки ширум светот се борат да ја задржат инфлацијата, но тоа е посебен проблем во Аргентина, каде што годишната стапка на инфлација скокна над 100% минатиот месец. Тоа е највисокото ниво од почетокот на 1990-тите, а во моментов Венецуела и Зимбабве се единствените две земји со повисока инфлација од Аргентина, според Меѓународниот монетарен фонд.
За споредба, инфлацијата се движи под 5% во САД, каде централната банка ги зголеми клучните каматни стапки за пет процентни поени во текот на изминатите 14 месеци.
Централната банка на Аргентина, исто така, се надева дека зголемувањето на стапката ќе ги поттикне инвестициите во валутата на земјата, се вели во соопштението на централната банка објавено во понеделникот. Прекумерната инфлација резултираше со голем одлив на инвестиции во аргентинскиот пезос, што доведе до пад на неговата вредност во однос на американскиот долар оваа година – за 23%.
Пред претседателските избори, закажани за октомври, министерот за економија Серџо Маса е фокусиран на „избегнување на уште поголема девалвација на валутата“, како и на ограничување на инфлацијата. Тој се смета за потенцијален кандидат од трета страна откако актуелниот претседател Алберто Фернандез минатиот месец објави дека нема да се кандидира за реизбор, а успехот на Маса најверојатно ќе биде поврзан со исходот од овој антиинфлациски план.
Но, новото зголемување на каматните стапки веројатно нема да донесе вистинска промена на аргентинските пазари, велат аналитичарите, а пишува CNN.
Финансискиот советник и поранешен заменик-директор на Централната банка на Аргентина, Мигел Кигел, вели дека се чувствува како „владата целосно губи поради инфлацијата“.
– Се плашам дека владата почна да реагира многу доцна: зголемувањето на каматите е секако главната стратегија за борба против инфлацијата, но за тоа е потребно време. Кога централната банка ќе ја зголеми каматната стапка, ефектите се чувствуваат два-три месеци подоцна, а таа временска рамка не е ефикасна во ситуацијата во Аргентина – рече тој.
