Најголемиот кинески производител на електрични возила BYD ја идентификуваше Шпанија како главен кандидат за локацијата на својата трета европска фабрика за автомобили за производство на модели за европскиот пазар, објави Ројтерс во вторник, повикувајќи се на извори запознаени со ова прашање.
Новиот производствен погон на BYD, кој би дошол по двете планирани фабрики во Унгарија и Турција, би бил значаен чекор за производителот, кој глобално се натпреварува со американската Tesla – а во исто време би помогнал во амбициите на Шпанија да стане главен европски центар за производство на електрични возила.
Се вели дека Шпанија е фаворит поради релативно ниските трошоци за производство и добрата достапност на чиста електрична енергија. Иако веќе некое време е познато дека BYD бара трета локација за производство за европскиот пазар, досега не е потврдено дека Шпанија е главната потенцијална локација за новата фабрика.
Шефот на BYD за Шпанија и Португалија, Алберто де Аза, минатиот месец изјави дека Шпанија би можела да биде идеална локација за понатамошно проширување на производството, поради нејзината добро развиена индустриска инфраструктура и евтина електрична енергија.
Шпанија, втор најголем европски производител на автомобили по Германија, досега привлече значителни инвестиции во секторот, вклучувајќи ги и оние од германскиот „Фолксваген“ и кинеските компании „Чери“ и „КАТЛ“, откако објави план од 5 милијарди евра во 2020 година за привлекување на производство на електрични возила и технологија за батерии, со средства од европските фондови наменети за закрепнување по пандемијата „Ковид-19“.
„BYD“ објави во 2025 година дека планира да ги произведува сите модели за европскиот пазар во Европа во рок од три години, што би ѝ помогнало на компанијата да ги заобиколи европските царински давачки. Планираната фабрика во Унгарија моментално е во изградба, а датумот на почеток на производството таму е поместен за 2026 година, во намален опсег од само неколку десетици илјади возила годишно. Фабриката во Турција исто така треба да започне со производство во 2026 година.
BYD сè уште не ја објави својата конечна одлука, а компанијата вели дека сè уште разгледува други земји освен Шпанија. Конечната одлука за новата фабрика, која треба да се донесе до крајот на оваа година, ќе треба да биде одобрена од кинеските регулатори. Ројтерс објави во март дека BYD разгледува други земји, вклучително и Германија, иако тоа беше доведено во прашање поради високите трошоци за работна сила и енергија. Шпанското Министерство за индустрија и BYD не одговорија на прашањата на медиумите.
Во првите осум месеци од оваа година, продажбата на BYD во Европа скокна за 280 проценти во споредба со истиот период во 2024 година, откако BYD почна да ги нуди таканаречените plug-in хибридни модели (PHEV), заедно со постојните електрични автомобили на батерии (BEV). Оваа година, BYD, исто така, ги реорганизираше своите европски операции со цел да ја зголеми продажбата, со вработување повеќе менаџери и продавачи.
Дипломатските и деловните односи меѓу Шпанија и Кина се подобрија во последните неколку години. Минатата година, Шпанија беше една од членките на ЕУ што се воздржа од гласање за одлуката за воведување царини за електрични возила произведени во Кина.
Кинеската влада наводно им кажала на своите производители на автомобили да престанат да инвестираат во европските земји што ги поддржаа царините. Германија потоа гласаше против европските царини.