Инвестициската банка Cитигруп очекува дека растот на вредноста на глобалните акции од 2024 година ќе се прелее и оваа година бидејќи пониските каматни стапки и послабата инфлација би требало да ги зголемат корпоративните приходи.
Тие проценуваат дека меѓународниот индекс MSCI, кој ги следи акциите во 23 развиени земји и 24 пазари во развој, може да порасне за десет отсто оваа година на приближно 1.140 поени.
Тие, исто така, предвидуваат раст од десет проценти на заработката по акција на глобално ниво, а за американскиот пазар и некои пазари во развој, тие очекуваат дека растот ќе биде дури 15 проценти.
Одржувајќи ја позитивната препорака за американските акции, Ситигруп наведува дека политиките на идниот претседател Доналд Трамп се главниот извор на несигурност, бидејќи царините, даночните намалувања и дерегулацијата носат комплицирана мешавина на фактори со позитивни и негативни економски ефекти.
Индексот S&P 500 доби вредност од 24 отсто во 2024 година, поттикнат од очекувањата за раст во сегментот на вештачката интелигенција, намалувањето на каматните стапки од страна на ФЕД и исходот од американските избори кои го доведоа Трамп во Белата куќа.
Што се однесува до другите пазари, Ситигруп одржува неутрална препорака за пазарите во развој, негативна препорака за акциите во Австралија и Јапонија и позитивна перспектива за континентална Европа.
Гледајќи ги глобалните сектори, Ситигруп дава позитивна препорака за акциите на компаниите кои се занимаваат со здравство и фармацевтски производи, неутрална оцена за оние од сегментот на основните добра како храна, пијалоци и хигиена и ги намали изгледите за компаниите во сегментот на несуштински стоки и услуги.