Во првиот квартал Италија извезла стоки во Кина за рекордни 7,1 милијарди евра, објави италијанскиот национален институт за статистика Истат.
Станува збор за огромен пораст на извозот во Кина во однос на истиот квартал лани, кога Италија извезла стоки во вредност од 3,7 милијарди евра.
Италија во февруари извезла најмногу стоки во Кина во вредност од три милијарди евра.
Некои аналитичари сметаат дека причината за овие рекордни бројки е заобиколувањето на санкциите против Русија, додека други сметаат дека членството на Италија во кинеската иницијатива „Појас и пат“ вроди со плод, пренесува Ројтерс.
По детална анализа, италијанските власти заклучија дека овој неочекуван раст е поврзан со големиот интерес на Кина за италијанските лекови, поточно за лекот UDCA, кој се користи за заболувања на црниот дроб. Земањето на лекот UDCA, кој го произведува италијанската компанија ICE, наводно може да се користи за да се спречи инфекција со коронавирус. Оваа информација е објавена во декемвриското издание на научното списание Nature.
