Belt organizer, односно специјална кутија за ремени е нов и уникатен начин за организирање на сите ремени, пишува на платформата за групно финансирање, Kickstarter.
Зад овој проект стои Андан Лекиќ од Црна Гора, кој веќе неколку години живее во Њујорк. Досега доби поддршка од 103 backers – инвеститори и собра 6.665 долари. Крајната цел е да се соберат 30.000 долари за што му остануваат уште 27 дена.
“Идејата за овој изум се роди додека и помагав на мојата сопруга да ја среди спалната соба. Скоро завршивме со сите работи и единствено што остана беше да се средат моите ремени што беа поставени на полицата во ормарот. Имав слика во главата за тоа што ми беше потребно да се средат моите ремени, се обидов да и објаснам на мојата сопруга, која ми рече: Ти имаш иновација. Во тој момент почнав низ интернет да пребарувам дали постои нешто во светот“, вели Лекиќ.
Првиот тест го направил благодарение на метален сад за вафли што го нашол во неговата кујна.
Веќе следниот обид го направил со пластична цевка, а потоа се нижеа уште неколку обиди додека не го пронајде идеалниот начин и форма за организирање и чување на ремените.
Најновиот прототип содржи повеќе прегради и во секоја од нив може да се смести по еден ремен. Кутијата може да се постави на ѕид или пак во некој мал агол бидејќи не зафаќа многу простор, но пружа голема функционалност.
