Во услови на раст на глобалните цени на енергијата, норвешкиот државен енергетски гигант Equinor објави рекорден профит во третиот квартал , велејќи дека прилагодената заработка на компанијата за периодот јули-септември се искачи на огромни 24,3 милијарди долари од 9,77 милијарди долари во третиот квартал во 2021 година.
– Цените на природниот гас ќе останат високи во ЕУ со години, поради падот на испораките од Русија – изјави во петокот извршниот директор на норвешкиот државен енергетски гигант Equinor.
Како што рече, главниот проблем во Европа е недостигот на гас.
– И со текот на времето ќе има недостиг, а ако Европа сака да го привлече тој гас, треба да очекува дека ќе плати висока цена во наредните години – рече Андерс Опедал на прес-конференција, пренесе Ројтерс.
Шефот на Equinor вели дека Норвешка во моментов испорачува рекордни количини гас на блокот, но предупредува дека најновите предлози на ЕУ – да се ограничи цената на оваа енергија – може да се покажат како „контрапродуктивни“ во борбата против кризата.
