Според проценките на хипотекарните банки, цените на станбените недвижности во Германија паднале за прв пат од 2010 година, но истовремено е забележан и пораст на цените на новите договори за изнајмување станови.
Цените на становите и куќите паднаа во третиот квартал за 0,7 отсто во однос на вториот квартал, покажува индексот на цените на недвижностите што во четвртокот го објави Здружението на хипотекарни банки (VDP).
Според Јенс Толкмит, извршен директор на vdp, трендот на раст на цените на недвижностите, кој траеше повеќе од 12 години, е завршен.
И додека користените станбени имоти благо поскапеа, цените на становите во повеќестанбените згради паднаа за речиси два отсто. Индексот на здружението, кое ги собира најважните германски финансиери за недвижнини, се базира на податоци за работењето на повеќе од 700 банки.
Во седумте најголеми германски метрополи становите и куќите поевтинија во просек за 0,7 отсто, како и на целиот пазар. Додека цените во Берлин останаа приближно исти како во вториот квартал (минус 0,1 отсто), во другите големи градови паднаа помеѓу 0,6 отсто (Келн) и 1,5 отсто (Минхен).
Но, во однос на третиот квартал од минатата година, станбените недвижности сепак поскапеа за 6,1 отсто. Здружението vdp во вториот квартал забележа плус од 10,7 отсто на годишно ниво.
Затоа здружението очекува „умерено намалување на цената“ во текот на целата година. Сепак, пазарот на недвижности отсекогаш се покажал како многу отпорен и во време на криза, па затоа не треба да очекуваме големи ценовни промени.
Сепак, додека експлозијата на цените на недвижностите стивна, трендот за нови договори за изнајмување е спротивен. Цените на закупнините на становите се зголемени за 4,8 отсто на годишно ниво, а за 1,6 отсто во однос на вториот квартал од годинава.
Големата побарувачка за станови за кирија се коси со немањето згради, падот на новоградбите, а причина се и бројните бегалци од Украина кои издаваат станови.
