Швајцарската компанија за реосигурување Swiss Re минатата година оствари нето добивка од 3,2 милијарди долари (2,97 милијарди евра), што е повеќе од шесткратен скок во споредба со претходната година.
Како што јави француската новинска агенција АФП, компанијата објави дека подобрите резултати се резултат на помалите трошоци за природни катастрофи.
Исплатите за големи природни катастрофи во вториот по големина реосигурител во светот паднаа на 1,3 милијарди долари за имот и жртви минатата година. Една година претходно, тие исплати беа 2,7 милијарди долари поради ефектите од ураганот Иан и поплавите во Австралија и Јужна Африка.
Освен во секторот за реосигурување имот и жртви, добивка забележаа и секторите за осигурување на живот и комерцијални решенија.
За оваа година групацијата ги потврди целите објавени на почетокот на декември минатата година, очекувајќи дека нето добивката ќе надмине 3,6 милијарди долари.
