Претседателката на Европската централна банка (ЕЦБ), Кристин Лагард, за првпат претстави конкретна бројка за можното влијание на трговската војна, што ја започнаа САД со нивните најважни партнери, врз економијата на еврозоната.
Според неа, царината од 25 отсто на американскиот увоз од Европа ќе го намали економскиот раст на еврозоната за 0,3 процентни поени во првата година. Одмаздничките мерки на Европската унија би додале уште 0,2 процентни поени на тоа.
„Краткорочно, тарифите, како и одговорот на ЕУ, и послабиот курс на еврото би можеле да ја зголемат инфлацијата за околу половина процентен поен“, рече Лагард во своето појавување пред европратениците.
Таа додаде дека влијанието ќе се намали на среден рок поради послабата економска активност, која потоа ги намалува инфлаторните притисоци.
Според неа, решението за секоја трговска војна е посилните трговски врски со другите партнери кои можат повеќе од да ги компензираат загубите направени од едностраните царини, вклучително и одмазднички мерки.
Сепак, како што јави Ројтерс, таа истакна дека сите проценки за трошоците за трговската војна се предмет на значителна неизвесност и дека ЕЦБ внимателно ќе ја следи ситуацијата и ќе дејствува за да ја заштити стабилноста на цените.
Лагард го поздрави германскиот план за зголемени буџетски трошоци за воени цели и инфраструктура, притоа минимизирајќи го значењето на резултирачкиот пораст на приносите на обврзниците.
„Би рекла дека пазарите го гледаат ова како зголемување на идниот раст финансиран во подолг временски период“, рече таа.
Таа додаде дека, според проценките на ЕЦБ, не гледа значаен инфлаторен ефект во овој поглед.
Да потсетиме, лани економскиот раст во еврозоната беше 0,9 отсто, а истото се предвидува и за оваа година, при што растот ќе се забрза до 1,2 отсто во 2026 година. Просечната инфлација годинава се предвидува на 2,3 отсто, а во 2026 година забавува на 1,9 отсто.