Цените на гасот во Европа паднаа на нивоата што последен пат беа видени пред почетокот на руската инвазија на Украина во февруари. Сегашната цена е 76,78 евра за мегават час. Потоплото време низ европскиот континент ја намали загриженоста за потенцијалниот недостиг.
Инвазијата ги разбранува глобалните енергетски пазари и ги принуди европските земји, вклучително и индустриската централа Германија, да бараат алтернативни снабдувачи.
Европа продолжи да се потпира на рускиот гас дури и по руската анексија на Крим во 2014 година и поддршката за сепаратистите во источна Украина.
Неделава пад е забележан и кај цените на нафтата на светските берзи поради загриженоста од зголемениот број случаи на Ковид-19 во Кина, најголемиот увозник на нафта во светот. Во текот на вчерашното тргување нафтата од типот Брент се продаваше за 0,8 проценти поевтино во споредба со претходниот ден и изнесуваше 83,65 долари за барел. Американската сурова нафта падна за 46 центи, или 0,6%, на 79,07 долари за барел.