Германскиот производител на автомобили Фолксваген планира да ги зголеми цените на своите возила што се испорачуваат во Соединетите држави без одлагање, што сугерира дека царините од 25 отсто на Доналд Трамп веднаш ќе влијаат на најголемиот европски производител на автомобили.
„Фолксваген“ на американските дилери им испратил меморандум со кој ги известува за новите такси, како и за одлуката за привремено прекинување на испораките на автомобили од Мексико во САД, додека возилата испорачани од Европа извесно време ќе бидат задржани во американските пристаништа, објави порталот „Аутомотив њуз“.
Портпаролот на Фолксваген го потврди постоењето на меморандумот, но одби да ја коментира неговата содржина.
Тарифите на Трамп претставуваат „фундаментална пресвртница во трговската политика“, рече Хилдегард Милер, претседател на Германското здружение на автомобилската индустрија (ВДА).
Според неа, политиката што ја спроведува администрацијата на Трамп ќе произведе само губитници, вклучително и САД, каде што потрошувачите ќе бидат погодени од „растечката инфлација и намалениот избор на производи“, пренесува Блумберг.
Фото: Pixabay