Вработените во шпанската модна компанија Зара од неколку европски земји најавија протести за Црниот петок, кој оваа година паѓа на 28 ноември.
Тие бараат Индитекс, сопственикот на Зара, повторно да ја воведе откажаната шема за поделба на профитот, објавува Ројтерс.
Протестите ги координира шпанскиот синдикат CCOO заедно со синдикатите во Белгија, Франција, Германија, Италија, Луксембург и Португалија, а ќе се одржат пред најголемите продавници на Зара во европските метрополи.
Претставничката на CCOO, Роза Галан, изјави дека Индитекс имал шема за поделба на профитот пред пандемијата, но дека таа била откажана и покрај фактот дека компанијата денес бележи екстремно високи приходи, а вредноста на нејзините акции се дуплирала во последните три години.
Црниот петок е клучен дел од малопродажната сезона каде што трговците на мало се стремат да привлечат купувачи и да ги исчистат старите залихи.
Вработените во малопродажбата традиционално го користат тој период за да ги истакнат своите барања.
Во 2022 година, протест на вработените во Индитекс се одржа и во Шпанија, по што компанијата ги зголеми просечните плати на работниците во шпанските продавници за 20 проценти, пренесува Танјуг.