🎥Вил Смит во шок од брзината: Мате Римац го повози познатиот актер со хиперавтомобилот „Невера“

За време на престојот во Хрватска, холивудскиот актер Вил Смит го посети кампусот на Римац Груп, каде што заедно со Матe Римац доживеа адреналинско возење во Невера кое го остави без здив.

Холивудскиот актер Вил Смит овие денови престојува во Хрватска, а еден од најважните моменти од неговата посета сигурно беше одењето во кампусот на Римац Груп. Таму го пречека искуство кое, судејќи според неговите реакции, ќе го памети долго време.

Смит седеше на совозачкото седиште во „Невера“, еден од најбрзите електрични хиперавтомобили во светот, додека Мате Римац беше зад воланот. Веќе при првото силно забрзување, со активирана контрола на стартување, актерот не можеше да го скрие своето воодушевување.

За време на возењето, тој го претстави својот домаќин со зборовите: „Ова е Мате, човекот кој го дизајнираше и изгради ова чудо од 2000 коњски сили!“, додека силата на забрзувањето буквално го прикова за седиштето.

Но, адреналинот не застана тука. Римац му покажа и на својот познат гостин што може Невера да направи во контролирано возење. Автомобилот остави траги од изгорени гуми и облаци од чад, а Смит ги снимаше сцените со својот мобилен телефон и гласно коментираше за тоа што го доживува.

На крајот од возењето, тој не криеше колку е импресиониран од искуството.

„Никогаш во животот не сум доживеал нешто вакво“, призна тој додека излегуваше од автомобилот.

Фото: Rimac Automobili-Facebook