Жител на Лихтенштајн на симнување филм од 5GB троши само две минути, додека еден Македонец за истиот филм ќе треба да почека скоро цел саат. Од таа причина, Лихтенштајн е на врвот, а земјава е 109-та од 221 земја и региони во светот по брзина на интернет, покажува истражувањето на Worldwide Broadband Speed League, објавено во Cable.co.uk.
Освен Лихтенштајн, со голема брзина на широкопојасната мрежа може да се пофалат и: островот што се наоѓа меѓу Франција и Велика Британија – Џерси, Андора, Гибралтар и Луксембург.
Од земјите во регионот со најбрз интернет може да се пофали Словенија, којашто се најде на 24-то место. За илустрација, филм од 5GB во оваа земја се спушта за нешто повеќе од 10 минути, благодарение на брзината од 65,46 mbps (megabits per second). Потоа следуваат: Бугарија (39-то место), Хрватска (52-ра), Грција (61-во место), Црна Гора (63-та), Србија (65-то место), Косово (73-та позиција), Босна и Херцеговина (88-ма) и Албанија (104-то место).
Македонија е најлошо позиционирана од земјите во регионот со брзина на интернетот од 11,48 mbps.
На дното на листата се најдоа: Јужен Судан, Јемен, Туркменистан, Екваторијална Гвајана и Сириска Арапска Република. Во овие земји еден филм од 5GB се симнува од 19 до 15 часа.
Фото: Freepik
