Здружението на индустријата за полупроводници (SIA) во понеделникот соопшти дека глобалната продажба на електронски чипови достигна рекорд од 555,9 милијарди долари во 2021 година, што е за 26,2 отсто повеќе од претходната.
Во исто време, SIA предвидува ново зголемување од 8,8% за 2022 година, бидејќи производителите на чипови продолжуваат да градат производствени капацитети за да одговорат на зголемената побарувачка, објави Ројтерс.
„Сè уште има навистина силен тренд на зголемена побарувачка. Едноставно нема да го постигнеме ефектот од забрзана потрошувачка што го имавме за време на пандемијата“, рече извршниот директор на SIA, Џон Нојфер, мислејќи на очекуваниот многу побавен раст проектиран за 2022 година.
Продажбата на полупроводници во 2020 година се зголеми за 6,8% во однос на претходната година, додека 2021 година беше првата година од 2018 година во која бројот на продадени чипови надмина 1 трилион, додаде тој.
Додека големите производители на полупроводници како што се Taiwan Semiconductor Manufacturing Co., Samsung Electronics Co. и Intel Corp. најавија десетици милијарди долари инвестиции во нови фабрики минатата година, Џон Нојфер истакна дека трендот на зголемување на дигитализацијата за време на пандемијата ќе продолжи да ја зголемува побарувачката и оваа година.
„Веруваме дека во догледна иднина големата побарувачка ќе наметна многу, многу агресивна изградба на фабрики за чипови“, рече тој.
Во 2021 година беа продадени 1,15 трилиони полупроводници, а најголемиот раст доаѓа од автомобилските чипови кои можат да издржат топлина и други физички предизвици, рече Нојфер. Продажбата за овој сегмент се зголеми за 34% во однос на претходната година, достигнувајќи 26,4 милијарди долари.
Кина остана најголемиот индивидуален пазар на полупроводници, со вкупна продажба од 192,5 милијарди долари во 2021 година, што е за 27,1 отсто повеќе од претходната година, објави SIA.
