Со околу седум милијарди гласовни пораки кои се испраќаат на WhatsApp секој ден, компанијата одлучи да ги освежи и подобри малку. Имено, во наредните недели на платформата ќе пристигнат нови функции, меѓу кои и можност за слушање на пораката додека се читаат други разговори и побрза репродукција (1,5x и 2x).
„Гласовните пораки им овозможија на луѓето брзо и лесно да водат поекспресивни разговори. Покажувањето на емоции или возбуда преку гласот е поприродно од текстот, а во многу ситуации гласовните пораки се претпочитана форма на комуникација на WhatsApp“, стои во официјалното соопштение. За подобрувањата на Facebook зборуваше и Марк Закерберг.
WhatsApp, според тоа, по долго чекање им овозможува на корисниците да го паузираат снимањето на гласовните пораки, што секако добро ќе им се најде на оние на кои мислите лесно им одлетуваат. Добрата вест е што гласовните пораки може да се слушаат и пред да се испратат. Да потсетиме, ова е опција која WhatsApp ја најави кон крајот на минатата година.
WhatsApp исто така ги истакнува визуелните промени. На пример, ќе се појави гласовна порака со „бранови“, односно визуелен приказ на звук, за корисниците полесно да го следат снимањето.
Конечно, треба да се означи функцијата Remember Playback, која му овозможува на корисникот да продолжи да ја слуша гласовната порака онаму каде што застанал по пауза, дури и ако го напушти разговорот.
