На светските пазари и минатата недела цените на нафтата драстично паднаа, вторпат по ред, бидејќи забавувањето на растот на најголемите светски економии доведува до слабеење на побарувачката за енергетски производи. Цената на барелот на лондонскиот пазар минатата недела потона за 8,7 отсто, на 87,62 долари, додека на американскиот пазар цената на барелот падна за речиси 10 отсто, на 80,08 долари.
Утрово нафтата брент се тргува по цена од 87,08 долари за барел, а WTI за 79,40 долари за барел, според податоците на Oilprice.com.
Падот на цените е последица на забавувањето на економскиот раст, бидејќи како резултат на тоа слабее и побарувачката за нафта.
Трговците најмногу ги загрижува натамошното зголемување на бројот на заразени со ковид-19 во Кина, што ги потопи надежите дека најголемиот увозник на нафта во светот наскоро ќе ги укине сите ограничувања за коронавирусот и на тој начин ќе придонесе за раст на побарувачката на енергија. Минатата недела, Пекинг и некои други големи градови пријавија најголем број на нови инфекции од почетокот на пандемијата.
„Зголемувањето на бројот на нови случаи на ковид во Пекинг и во другите градови не потсети дека не треба да очекуваме промена на траекторијата на економски раст и побарувачката на нафта во најголемиот светски увозник на нафта во толку брзо“, рече Тамас Варга од PVM.
Поради рестриктивните мерки против ширењето на вирусот, растот на втората по големина економија во светот веќе подолго време забавува. Се очекува и натамошно забавување на растот на американската економија, со оглед на тоа што тамошната централна банка, ФЕД, најавува дополнително зголемување на каматните стапки поради високата инфлација.
Организацијата на земјите извознички на нафта (ОПЕК) повторно ја намали својата проценка за растот на глобалната побарувачка на нафта во 2022 година минатата недела, по петти пат од април, наведувајќи ги ковид-19 во Кина, високата инфлација и зголемените каматни стапки во големите економии.
Меѓународната агенција за енергетика (ИЕА), пак, ја зголеми прогнозата за раст на побарувачката оваа година и потсети дека на 5 декември стапува на сила ембаргото на ЕУ за увоз на руска нафта од бродови, што значи дека треба да се најде замена за околу 1,1 милиони барели нафта дневно. Сепак, во 2023 година, растот на побарувачката треба да биде забавен поради неповолните економски движења, проценува ИЕА.
