Американскиот министер за финансии Џенет Јелен им порача на лидерите на водечките светски банки дека непокачувањето на горната граница на јавниот долг на САД ќе биде „катастрофално“ за финансискиот систем и повтори дека прашањето треба да се реши без одлагање.
Јелен нагласи „дека е неопходно Конгресот да се справи со лимитот на долгот и ги нагласи реалните и сериозни последици од неисполнување на обврските врз банкарскиот систем и домашната и глобалната економија“, се вели во соопштението на Министерството за финансии на САД, објавено по нејзината средба со повеќе од дваесет извршни директори, службеници и други менаџери, свикана од Институтот за банкарска политика.
На средбата со Јелен, покрај другите, учествуваа и претставници на JP Morgan Chase, Citigroup и Централната банка на САД.
