Apple објави скромно поголем квартален профит и покрај новиот пад на приходите, бидејќи рекордните перформанси во услугите ја надоместија помалата продажба на iPhone.
Профитот на Apple за третиот фискален квартал изнесува 19,9 милијарди долари, што е за 2,3 отсто повеќе во споредба со периодот пред една година. Приходите повторно паднаа, овој пат за 1,4 отсто на 81,8 милијарди долари, пренесе АФП.
Светлите точки во кварталот за технолошкиот гигант вклучуваат „високо ниво“ на приходи од услуги како што се App Store, Apple pay и Apple TV и други претплатни услуги.
Apple исто така забележа повисоки приходи во Кина, што е подобрување во однос на претходниот квартал, кога приходите беа помали од пред една година.
Продажбата порасна и во Европа, но падна во Америка, Јапонија и остатокот од азиско-пацифичкиот регион.
Apple претрпе пад од 2,4 отсто во продажбата на iPhone, што претставува речиси половина од вкупниот приход. Компанијата, исто така, доживеа пад на приходите од продажбата на Mac и iPad.
Apple го опиша падот на продажбата во овие области како одраз на макроекономската слабост, при што инфлацијата на цените влијае на буџетот на домаќинствата.
„Со задоволство можеме да известиме дека имавме рекордни приходи од услуги во текот на јунскиот квартал со над една милијарда платени претплати и видовме континуирана сила на пазарите во развој благодарение на силната продажба на iPhone“, рече извршниот директор Тим Кук.
Акциите на Apple паднаа за 1 отсто на 189,28 долари во тргувањето после работното време.
