Европската унија официјално започна истрага за кинеските субвенции за производителите на електрични возила, што може да доведе до воведување казнени давачки за увозот во блокот.
Претседателката на Европската комисија Урсула фон дер Лајен минатиот месец изјави дека ќе биде покрената истрага против субвенциите, обвинувајќи го Пекинг дека го преплавил глобалниот пазар со евтини електрични автомобили.
„Нивната цена вештачки се одржува ниска со огромни државни субвенции. Ова го нарушува нашиот пазар“, тврди таа.
Истрагата потенцијално може да доведе до наметнување казнени давачки за увозот во ЕУ.
Кинеските електрични автомобили обично се околу 20% поевтини од моделите направени во 27-члената Унија, соопшти Европската комисија, додавајќи дека уделот на кинеските електрични возила што се продаваат во ЕУ може да достигне 15% до 2025 година.
Во Германија се стравува дека нејзината автомобилска индустрија може да добие удар од истрагата.
Германските производители на автомобили продадоа 30 до 40 отсто од своите автомобили на кинескиот пазар, изјави директорот на Центарот за истражување на автомобилската индустрија Фердинанд Дуденхофер. Според него, германските компании би биле првата цел на контрамерките на Пекинг.
Кинеското Министерство за трговија ја обвини истрагата на ЕУ за „еклатантно протекционистичко однесување“ што ќе има „негативно влијание“ врз односите.
Официјалното започнување на истрагата на ЕУ беше објавено во средата во Службениот весник на Европската унија.
ЕУ веќе воведе антидампинг давачки за соларните панели од Кина.