Годишната стапка на инфлација во Австрија во септември достигна шест отсто, додека во август таа запре на 7,4 отсто. Ова е најниската инфлација во последните 19 месеци. Главната причина за намалувањето се многу поевтините извори на енергија, пренесува германската прес-агенција dpa, објави австрискиот завод за статистика.
Цените на енергенсите беа еден од главните фактори на инфлацијата во изминатите месеци, но сега ја потиснуваат, пишува заводот за статистика.
Нагло забавува и растот на цените на станбените и комуналните услуги, каде септемвриската инфлација изнесува 4,6 отсто, додека во август запре на 10,1 отсто.
За растот на цените придонесоа за 11,4 отсто поскапите услуги во рестораните и хотелите и за 8,4 отсто поскапите храна и безалкохолни пијалоци.
Заводот во првата септемвриска проценка објави дека септемвриската инфлација изнесува 6,1 отсто.
Инфлацијата во Австрија и натаму е над просекот на еврозоната, каде што во септември, според објавените податоци на европската статистичка служба Еуростат, достигна 4,3 отсто на годишно ниво, откако во август беше 5,2 отсто.
Усогласениот индекс на потрошувачки цени, кој ги споредува цените во ЕУ, во септември во Австрија изнесуваше 5,7 отсто, што е за 1,8 процентни поени пониско од претходниот месец.