Поранешниот крипто-претприемач Сем Банкмен-Фрид во своето сведочење на поротата на судењето за измама призна дека „многу луѓе биле оштетени“ кога пропаднала берзата FTX што тој ја основал. Поранешен претприемач вели дека направил многу грешки додека водел берза за криптовалути, пишува Би-би-си.
31-годишниот Американец беше обвинет дека ги лажел инвеститорите и кредиторите и дека крадел пари од клиенти. Тој ги отфрли обвинувањата. „Мислевме дека можеме да го направиме најдобриот производ на пазарот. Се испостави дека е спротивно. Многу луѓе настрадаа, клиенти, вработени, а компанијата заврши во банкрот“, им рече тој на своите адвокати на воведното испитување.
„Направив серија мали и серија големи грешки“
Банкмен-Фрид изјави пред федералниот суд во Менхетен дека направил „низа мали грешки и серија големи грешки“ додека ја водел сега банкротираната берза. Најголемата грешка, рече тој, е немањето посебен оддел за управување со ризици. Тој рече дека не измамил никого и не земал средства од клиентите.
Банкмен-Фрид почна да сведочи во четвртокот на необично рочиште откако поротата беше испратена дома. Окружниот судија на САД, Луис Каплан, побара од него да го претстави своето сведочење за вмешаноста на адвокатот во клучните одлуки, за да може да одлучи дали тоа е прифатливо како доказ. Банкмен-Фрид тврди дека постапил по правен совет.