Претседателот на Федералните резерви на САД, Џером Пауел, во петокот навести дека намалувањето на каматните стапки ќе биде „прерано“ и дека тие може да се зголемат во наредните месеци.
„Доколку е потребно, ќе ја заостриме монетарната политика, би било прерано да се шпекулира и да се каже дека постигнавме доволно во сузбивањето на инфлацијата“, рече Пауел во говорот на колеџот Спелман во Атланта, пренесува Anadolu Agency.
Банката на федерални резерви го прескокна зголемувањето на каматните стапки по трет пат минатиот месец, одржувајќи ја стапката на федералните фондови во целниот опсег од 5,25 проценти до 5,5 проценти, што е највисоко во последните 22 години.
Многу аналитичари веруваат дека ФЕД го достигна крајот на својот циклус на монетарно затегнување, што беше без преседан во борбата против рекордната инфлација, која забавува во последните месеци. Откако се зголеми на 9,1 отсто во јуни минатата година, што е највисока инфлација во повеќе од 40 години, годишната потрошувачка инфлација во САД падна на три отсто овој јуни, но се зголеми на 3,7 отсто во септември.
Пауел, сепак, рече дека членовите на Федералниот комитет за отворен пазар (FOMC) гледаат и чекаат засега.
„Ние донесуваме одлуки на основа од состанок до состанок, врз основа на сите дојдовни податоци и нивните импликации за изгледите за економската активност и инфлацијата, како и за билансот на ризици“, рече тој.