Саудиска Арабија потроши милијарди долари за да се трансформира во центар за електрични возила и да ги надмине пречките, вклучително и недостатокот на инфраструктура, таленти и суровини, додека се обидува да ја достигне глобалната трка за профит од новата индустрија.
Како дел од поширокиот план на саудискиот престолонаследник Мохамед бин Салман да ја одвикне економијата од нафтата и да создаде нови работни места, земјата инвестираше најмалку 10 милијарди долари во американската Lucid Motors и го лансираше Ceer, сопствен бренд за електрични возила, пишува Ројтерс.
Државниот инвестициски фонд вреден 700 милијарди долари има за цел да произведува годишно 500.000 електрични автомобили во Саудиска Арабија до 2030 година, додека во 2026 година е планирано производство на 150.000 возила. Сепак, единствената фабрика за автомобили во Саудиска Арабија, која беше отворена во септември, состави околу 800 возила до крајот на годината, користејќи делови испорачани од САД.
Саудиска Арабија не успеа да привлече производители на автомобили во претходните години. Јапонската Toyota ја одби таквата понуда во 2019 година, наведувајќи ги високите трошоци за работна сила, недостатокот на локални добавувачи и малиот локален пазар.
За Саудиска Арабија, една од најголемите тешкотии е привлекувањето на производители на автомобилски компоненти, од вратите на автомобилите до моторите, бидејќи земјата нема значителна локална индустрија за снабдување. Домашниот производител Ceer, заедничко вложување меѓу Саудискиот фонд и тајванската компанија Foxconn, планира да започне со производство до 2025 година, но допрва треба да ја изгради својата фабрика.