![9](https://biznisinfo.mk/wp-content/uploads/2024/04/9.jpg)
Индустриската активност во еврозоната, опадна во март 2024 година, како одраз на континуираниот застој во побарувачката и проблемите во двата водечки производители, Германија и Франција, покажа извештајот на S&P Global.
Конечниот индекс на менаџери за набавка (PMI) во индустријата во еврозоната падна за 0,4 поени во однос на февруари, на 46,1 поени, пресметано од Хамбуршката комерцијална банка (HCOB), која го составува извештајот за S&P Global. Сепак, падот е нешто поблаг од наведената прелиминарна проценка.
Вредностите пониски од 50 поени укажуваат на пад на активноста, а PMI за индустријата останува под тоа ниво 21 месец по ред, пренесува Хина.
Падот на фабричката активност, пред сè, се одразува на слабата побарувачка, што се одразува со падот на индексот на нови нарачки во март, 23-ти месец по ред, и покрај намалувањето на фабричките цени, а најизразен од ноември минатата година.
Истражувањето покажа и дека производителите во земјите кои ја користат заедничката европска валута повторно го намалиле бројот на вработени.
Во групата од четири водечки индустриски сили, Германија и Франција се во лоша ситуација, додека Шпанија и Италија забележаа благо закрепнување во февруари и март оваа година, забележува главниот економист на HCOB, Кирус де ла Рубија.
„Сепак, ова досега не беше доволно за еврозоната како целина повторно да почне да бележи раст“, предупредува тој, нагласувајќи дека промена на трендот може да се очекува само кога сите четири земји ќе се вратат во функција.
Светла точка се подобрените очекувања на деловните лидери, изразени во растот на соодветниот индекс на највисоко ниво за речиси една година, од 57,4 поени.