![still-life-2366084_640](https://biznisinfo.mk/wp-content/uploads/2024/05/still-life-2366084_640.jpg)
Европа трупа кафе за да ги избегне тешкотиите што би можеле да настанат на почетокот на следната година со стапувањето во сила на регулативата на Европската унија за борба против уништувањето на шумите, објави Меѓународната организација за кафе (ICO).
Залихите во земјите-производители се при крај бидејќи увозниците брзаат со пратките пред новиот закон со кој ќе се забрани увозот на земјоделски производи произведени на обесшумена земја, рече извршниот директор на ICO, Ванусија Ногуеира.
„Увозниците ги забрзуваат пратките бидејќи законот отвори прашања на кои Европејците сè уште не одговориле“, рече Ногуеира на маргините на меѓународниот семинар за кафе во 2024 година во Сантос, Бразил. „Кој знае дали ќе нѐ чека изненадување“, додаде таа.
Европската унија е најголемиот пазар на кафе во светот, а производители се тропските земји. Се очекува Европската унија да обезбеди изземање на одреден период за да им даде време на земјите производители и на трговците да се подготват за новите обврски, но тоа не е сигурно, посочи претставникот на асоцијацијата.
Земјите како Бразил, Колумбија и Костарика се подобро подготвени за закон кој бара од производителите да добијат потврда дека кафето не се произведува на обесшумена земја, додека малите фармери во африканските земји ќе имаат повеќе проблеми, објасни таа.