Пазарот на електрични автомобили во Европа се лади, особено во Германија. Нема веќе субвенции на најважниот европски пазар и бројките од продажбата не се спектакуларни.
– Клиентите не реагираат соодветно. Барем не со сумата што беше предвидена или што политичарите си ја поставија како цел – вели поранешниот шеф на Porsche и VW Матијас Милер во интервју за N-TV. Поранешниот менаџер на VW има објаснување и зошто клиентите сè уште ги избегнуваат електричните автомобили. Возилата сè уште се прескапи, но многу од тоа ќе се промени во наредните години. Покрај тоа, опциите за полнење се ограничени, а електричната енергија е скапа и често не е еколошка.
Друга причина е краткиот опсег. Дизел возачот е навикнат да вози од 800 до 1000 километри во сите временски услови и брзо да го полни своето возило. Во овој контекст, Милер ја доведува во прашање и предложената забрана на ЕУ за мотори со внатрешно согорување. Според него, барем во овој момент треба повторно да се отвори дискусијата за важното прашање за забраната. Главниот фокус треба да биде на тоа дали хибридите и синтетичките горива можат да бидат решение.
– Тоа не е решение за следните 20 или 30 години, но барем во преодниот период, за да се овозможи непречена транзиција за клиентите, тоа би можело да биде решение – јасно вели Милер.