Хрватска е номинирана во три категории на престижната американска награда за туризам Travvy Awards, која често се нарекува туристички Оскар.
Станува збор за номинации за најдобра дестинација на Медитеранот, за најдобра дестинација за крстарења, додека Хрватскиот туристички одбор е номиниран во категоријата најдобра европска туристичка организација.
„Воодушевени сме што квалитетите на Хрватска како туристичка дестинација се специјално признати со наградите Travvy 2024. Овие номинации се одраз на напорната работа и посветеноста на хрватската туристичка индустрија во постигнувањето меѓународна конкурентност. Ние сме многу горди што нашата земја, врз основа на нејзините предности и широк спектар на туристички производи и услуги, успешно ја претставуваме како врвна дестинација на глобално ниво“, изјави Лејла Крешиќ-Јуриќ, директор на претставништвото на HTZ во САД.
Наградите Travvy, спонзорирани од TravelPulse.com и списанието AGENTatHOME, се една од најпрестижните награди во американската туристичка индустрија.
Тие се доделуваат на различни групи како што се национални туристички организации, дестинации, тур-оператори, превозници, туристички агенти, производи итн.
За нив гласаат различни експерти од туристичкиот сектор, но и пошироката јавност.
Победниците на наградите Travvy за 2024 година ќе бидат објавени на церемонија на 7 ноември во конгресниот центар Greater Fort Lauderdale во Флорида.