Белгија ја повика Европската унија да го забрани рускиот течен природен гас (ЛНГ), предупредувајќи дека компаниите не можат да ги раскинат долгорочните договори освен ако блокот како целина не воведе санкции, објави во четвртокот Financial Times, цитирајќи го белгискиот министер за енергетика.
ЕУ мора да оди понатаму за да го спречи рускиот ЛНГ да стигне до блокот бидејќи расте загриженоста поради зголемениот увоз, изјави за весникот белгискиот министер за енергетика Тине Ван дер Страетен.
Типичните договори за ЛНГ траат една деценија или повеќе, па многу од нив во моментот се пред сеопфатната инвазија на Русија на Украина во 2022 година.
„Го истраживме ова… Имаме руски гас што доаѓа во Белгија. Нашиот закон нема да помогне. Ни треба европски пристап“, рече Ван дер Страетен. Софи Херманс, холандската министерка за клима и зелен раст, во писмо до националниот парламент потврди дека ќе го покрене ова прашање следниот месец на состанокот на министрите за енергетика на земјите-членки.
Таа нагласи дека бројот на танкери кои превезуваат руски гас што пристигнуваат на главниот терминал во Ротердам е нагло зголемен: од просечно еден месечно во средината на 2022 година до средината на 2024 година, достигна два месечно. Танкер со стандардна големина обично носи од 70.000 до 80.000 тони гас.
„Нема други опции во кои можеме да ги раскинеме приватните договори без да ги применуваме правилата за санкциите на Европската комисија“, се согласи Херманс. Брисел постојано ги притиска земјите-членки да ја намалат нивната зависност од руските фосилни горива откако Москва ја започна инвазијата.
По Шпанија, Белгија беше втор најголем увозник на руски течен природен гас минатата година, според аналитичката компанија Кплер. Но, се чини дека Франција ќе ги надмине Белгија и Шпанија оваа година по зголемениот увоз во пристаништата Данкерки и Монтоар.
