Меѓународниот монетарен фонд (ММФ) ја повика Турција да ја засили својата борба против инфлацијата, наведувајќи го политички чувствителното најавено зголемување на платите како потенцијална пресвртна точка.
– Постепениот пристап на властите во борбата против инфлацијата го продолжува периодот во кој може да се појават ризици – објави во петокот ММФ, пренесува Блумберг.
ММФ препорача „поголеми и однапред поставени“ чекори за намалување на буџетскиот дефицит и ги повика властите да продолжат со координирани фискални и монетарни интервенции, како и мерки во областа на доходната политика.
Турција ја зголеми својата минимална плата двапати во 2023 година во обид да им помогне на работниците кои се соочуваат со криза на трошоците за живот во изборна година.
Владата во 2024 година само еднаш ја зголеми минималната плата и покрај барањата на синдикатите и опозициските партии, пренесува Танјуг.
