Деловната активност во еврозоната нагло ослабна во ноември, како одраз на намалувањето на активноста во услужниот сектор за прв пат од почетокот на годината, покажа извештајот на S&P Global.
Индексот на менаџери за набавка (PMI) во приватниот сектор на еврозоната падна во ноември за 1,9 поени во однос на октомври и изнесува 48,1 поен, покажаа прелиминарните пресметки на Хамбуршката трговска банка (HCOB), која го составува извештајот за S&P Global.
Вредностите на индексите пониски од 50 поени укажуваат на пад на активноста, додека вредностите повисоки од 50 укажуваат на зголемување на активноста.
„Ситуацијата тешко дека би можела да биде многу полоша. Производствениот сектор на еврозоната сè подлабоко тоне во рецесија, а проблеми сега се појавија и во услужниот сектор, по два месеци маргинален раст“, заклучи главниот економист на Хамбуршката комерцијална банка, Сајрус де ла Рубија.
Извештајот за ноември упатува на заклучок дека подобрување не е сигурно во наредниот период, вели Хина, со оглед на континуираното слабеење на побарувачката.
Индексот што ја покажува состојбата во клучниот услужен сектор, сепак, падна на негативна територија за првпат по десет месеци, сигнализирајќи пад на активноста по два месеци маргинален раст.
Иако компаниите го зголемија бројот на вработени и во ноември, менаџерите покажаа воздржаност и во наредната година, покажа истражувањето, заедно со влошените деловни очекувања, покажано со падот на вредноста на соодветниот индекс на најниско ниво во последните две години.
