Глобалната невработеност остана стабилна минатата година на историски ниски пет проценти и се очекува да остане на тоа ниво во 2025 година, се вели во извештајот на Меѓународната организација на трудот (МОТ) објавен во четвртокот.
Сепак, организацијата со седиште во Женева истакна дека забавувањето на глобалниот економски раст од 3,3 на околу 3,2 отсто минатата година, како и постепеното забавување на среден рок, ќе го ограничи создавањето нови работни места.
„Глобалната економија продолжува да расте со умерено темпо, но се предвидува дека постепено ќе го губи импулсот, спречувајќи посилно и поодржливо закрепнување на пазарот на трудот“, се вели во водечкиот извештај на МОТ за глобалните трендови на вработување и социјалните прашања.
Сегашната глобална стапка на невработеност е најниска од 1991 година, кога МОТ почна да го спроведува ова истражување и се предвидува дополнително да се намали на 4,9 отсто до 2026 година.
Сепак, некои земји и групи не успеваат да го искористат позитивниот тренд, при што младите се соочуваат со значително повисока стапка на невработеност од 12,6 отсто, се вели во извештајот.
Иако, според Ројтерс, некои европски земји забележаа пад на невработеноста во последните години, земјите како Јужна Африка објавија постојано високи нивоа на невработеност над 30 проценти минатата година.
Генералниот директор на МОТ, Гилберт Хонгбо, поранешен премиер на Того, повика на решителна акција за решавање на пречките што го спречуваат просперитетниот пазар на трудот.