Американскиот потпретседател Џеј-Ди Венс ги предупреди Европејците дека, како што рече, нивната прекумерна регулација на вештачката интелигенција (ВИ) може да ја задуши технологијата .
Расположението кон вештачката интелигенција се менува како што технологијата се вкорени, од безбедносни грижи до геополитичка конкуренција, а земјите се натпреваруваат да создадат нов гигант со вештачка интелигенција, пишува Ројтерс.
Венс, кој отворено ја промовира агендата „Америка на прво место“ на администрацијата на претседателот Доналд Трамп, рече дека Соединетите Држави имаат намера да останат доминантна сила во областа на вештачката интелигенција и силно се спротивставија на многу построгиот регулаторен пристап на Европската унија.
„Веруваме дека прекумерното регулирање на секторот на вештачката интелигенција може да убие револуционерна индустрија“, рече Венс на самитот на вештачката интелигенција во Париз.
– Ние многу силно веруваме дека вештачката интелигенција мора да остане ослободена од идеолошка пристрасност и дека американската вештачка интелигенција нема да биде кооптирана во алатка за авторитарна цензура – рече тој.
Тој, исто така, истакна дека навигацијата по европските правила за приватност на интернет, познати по акронимот GDPR, претставува бескрајни правни трошоци за помалите компании.
Иако американскиот потпретседател рече дека САД ќе ја поддржат американската вештачка интелигенција, која ја развиваат големите компании, тој исто така рече дека „законите (американските) ќе обезбедат еднакви услови за игра за големите технолошки компании, помалите технолошки компании и сите други (фирми) што развиваат (технологија).
Тој додаде дека светот треба да биде скептичен кога оние што се на власт повикуваат на безбедносни прописи кои би можеле да ја зацврстат нивната моќна позиција.
Европските пратеници го одобрија Законот за вештачка интелигенција минатата година, првиот сеопфатен збир на правила во светот за оваа технологија.
Технолошките гиганти и некои престолнини се залагаат неговата имплементација да биде попустлива, потсетува Ројтерс.
На првиот ден од самитот, неговиот домаќин, францускиот претседател Емануел Макрон, ја повика Европа да ги намали регулативите за да го олесни процутот на вештачката интелигенција на Стариот континент, откако потегот на администрацијата на Трамп да ги олесни ограничувањата на вештачката интелигенција откри колку се различни стратегиите кон технологијата во САД, Кина и Европа.
Венс моментално ја предводи американската делегација на настан на кој претставници од речиси 100 земји, вклучувајќи ги Кина, Индија и САД, се состануваат за да утврдат дали може да се усогласат спротивставените национални интереси.