Како што глобалната економија се соочува со неизвесности, еден тренд станува непобитен – богатството на најбогатите расте побрзо од кога било…
Според најновиот извештај на Oxfam International, светот ќе ја види појавата на своите први пет трилионери во следните десет години, што дополнително ќе го продлабочи јазот меѓу ултра богатите и остатокот од населението.
Извештајот на Oxfam „Takers Not Makers“ открива дека богатството на милијардерите пораснало за 2 трилиони долари само во 2024 година, три пати побрзо од претходната година. Во меѓувреме, бројот на луѓе кои живеат во сиромаштија остана практично непроменет од 1990 година, според податоците на Светска банка.
Некои од најбогатите поединци, како Илон Маск (433 милијарди долари), Џеф Безос (239 милијарди долари), Лари Елисон (204 милијарди долари) и Марк Цукерберг (211 милијарди долари), го зголемуваа своето богатство во просек за 100 милиони долари дневно. Овој податок ја истакнува огромната брзина на акумулација на капиталот – дури и ако изгубат 99% од своето богатство преку ноќ, тие сепак би останале милијардери.
Амитаб Бехар, извршен директор на Oxfam International, предупредува на економски систем кој ги фаворизира привилегираните, додека мнозинството од светското население се соочува со економска несигурност.
– Заробувањето на глобалната економија од неколку привилегирани достигна нивоа што некогаш беа незамисливи. „Ако не се преземат мерки, светот не само што ќе добие трилиони, туку ќе добиеме и уште поголема концентрација на моќ во рацете на мал број луѓе“, рече Бехар.
Извештајот исто така посочува дека 60% од богатството на милијардерите е наследено или резултат на монополи и политички врски, а не на лични иновации или претприемачки дух. Во овој контекст, Оксфам повикува на данок на богатство и реформа на глобалниот економски систем, за да се спречи уште поголема социјална и економска нееднаквост.
Иако имињата не се експлицитно наведени, најверојатни кандидати за статус на трилионер се оние кои веќе доминираат на листите на најбогатите – Маск, Безос, Цукерберг и Елисон, додека високо на листата е и Бернард Арно, сопственикот на LVMH.
Додека некои ова го гледаат како доказ за економска моќ и капиталистички успех, други предупредуваат дека светот се повеќе се движи кон невидена економска поларизација. Едно е сигурно – ако трендовите продолжат со ова темпо, до 2035 година ќе имаме не еден, туку пет трилионери, додека милиони ќе останат на прагот на сиромаштија.