Цените на нафтата продолжија да паѓаат во вторникот по извештајот дека ОПЕК + ќе продолжи со планираното зголемување на производството во април, бидејќи пазарите се подготвуваат за ефектите од американските царини врз Канада, Мексико и Кина, како и кинеските контрамерки против САД.
Фјучерсите на суровата нафта „брент“ поевтинија за 57 центи на 71,05 долари (65,40 евра) за барел, додека американската „Вест Тексас интермедијт“ (WTI) поевтини за 39 центи на 67,98 долари (62,60 евра).
Организацијата на земјите извознички на нафта (ОПЕК) и сојузниците како Русија, познати како ОПЕК +, одлучија да продолжат со планираното зголемување на производството на нафта во април за 138.000 барели дневно, што е прво зголемување на групата од 2022 година.
„Сегашниот тренд на намалување на цените на нафтата првенствено е поттикнат од одлуката на ОПЕК + за зголемување на производството и наметнувањето на американските царини“, изјави за Ројтерс Дарен Лим, стратег за суровини во Филип Нова. Дополнителни фактори кои ја комплицираат ситуацијата, рече тој, се геополитичките настани поврзани со конфликтот меѓу Русија и Украина.
„Иако оваа одлука е насочена кон постепено укинување на претходните намалувања на производството, таа предизвика загриженост за потенцијалното прекумерно снабдување на пазарот“, рече Лим.
На цената на нафтата влијаат и новите одлуки на американскиот претседател. Имено, претседателот Доналд Трамп ја паузираше сета американска воена помош за Украина по судирот во Овалната соба со претседателот Володимир Зеленски минатата недела.
Во вторникот стапија на сила и тарифите на Трамп од 25 отсто за увоз од Канада и Мексико, со 10 отсто царина за канадската енергија, додека царините за кинески стоки ќе се зголемат од 10 на 20 отсто.
Аналитичарите очекуваат царините да влијаат на економската активност и побарувачката на гориво, што ќе изврши дополнителен притисок врз цената на нафтата.
„Учесниците на пазарот имаат тешко време да ги проценат ефектите од серијата енергетски политики донесени од администрацијата на Трамп овој месец. Сепак, оние кои имаат негативно влијание, особено американските тарифни мерки, во моментов преовладуваат“, напишаа во белешката аналитичарите на BMI.
Откако американските тарифи стапија на сила во вторникот, Кина брзо возврати со најава за зголемување на царините од 10 до 15 отсто на увезените американски стоки, вклучително и низа земјоделски и прехранбени производи, и стави 25 американски компании под извозни и инвестициски ограничувања.
Дополнителен притисок врз цената на нафтата беше предизвикан од американското суспендирање на воената помош за Украина, бидејќи пазарот тоа го протолкува како знак за можно олеснување на конфликтот. Ова за возврат може да доведе до олеснување на санкциите кон Русија, со враќање на поголема понуда на нафта на пазарот.
Паузата уследи по извештајот на Ројтерс дека Белата куќа побарала од Стејт департментот и Министерството за финансии да состават листа на санкции кои би можеле да бидат олеснети за целите на разговорите со Москва, според извори.