Taiwan Semiconductor Manufacturing Co (TSMC) планира да инвестира уште 100 милијарди долари во Соединетите држави, вклучително и изградба на пет дополнителни фабрики за производство на чипови во наредните години, објави нејзиниот извршен директор C.C. Веи во понеделникот заедно со претседателот Доналд Трамп.
Доминантната позиција на Тајван како производител на чипови кои се користат во технологијата, од мобилни телефони и автомобили до борбени авиони, предизвика загриженост во Соединетите држави, особено во светлината на претстојната тарифна војна со Кина.
Инвестицијата од 100 милијарди долари за зајакнување на домашното производство доаѓа по веста од април минатата година дека TSMC планира да ги зголеми планираните инвестиции во САД за 25 милијарди долари, на вкупно 65 милијарди долари, и да изгради трета фабрика во Аризона до 2030 година.
TSMC не обезбеди временска рамка за своите нови инвестиции, освен што истакна дека потфатот ќе отвори 40.000 работни места во градежниот сектор во следните четири години.
Изградбата на споменатата фабрика во Аризона, потсетува Ројтерс, беше погодена од одложувања, а компанијата на крајот почна да произведува чипови во 2024 година, по повисоки трошоци отколку во нејзините капацитети во Тајван.
Компанијата, исто така, планира да изгради центар за истражување и развој како дел од стратегијата за која Веи најави дека ќе биде „најголемата поединечна странска инвестиција во историјата на САД“.
Акциите на компанијата, кои котираат на тајванската берза, во вторникот паднаа за два отсто.
Како клучен партнер на Nvidia, Qualcomm и AMD, TSMC е клучен играч во американската индустрија за чипови, а преместувањето на поголем дел од своето производство на територијата на САД би помогнало да се реши значителниот ризик од синџирот на снабдување за тие компании.